ଚାଇନା ଆପ୍ ନିଷେଧ ପାଇଁ ଭାରତର ନିଷ୍ପତ୍ତିକୁ ଆମେରିକାର ସମର୍ଥନ
ଓ୍ୱାଶିଂଟନ୍- ଭାରତରେ ୫୯ଟି ଚାଇନା ଆପ୍କୁ ନିଷେଧ କରାଯାଇଛି । ଏହାକୁ ଆମେରିକା ସମର୍ଥନ କରିଛି। ଆମେରିକାର ବୈଦେଶିକ ସଚିବ ମାଇକ୍ ପମ୍ପିଓ ଏହାକୁ ସମର୍ଥନ କରିଛନ୍ତି । ନୂଆଦିଲ୍ଲୀର ଏହି ନିଷ୍ପତ୍ତି ଦେଶର ସୁରକ୍ଷା ପାଇଁ ଆବଶ୍ୟକ ବୋଲି ସେ କହିଛନ୍ତି । ଭାରତର ଏହି ନିଷ୍ପତ୍ତିକୁ ଆମେରିକା ସ୍ୱାଗତ କରୁଥିବା କଥା ସେ ସୂଚନା ଦେଇଛନ୍ତି । ଏହି ଆପ୍ ଚୀନ୍ର କମ୍ୟୁନିଷ୍ଟ ପାର୍ଟିକୁ ସମସ୍ତ ସୂଚନା ଦେଉଥିଲା ବୋଲି ସେ ପ୍ରକାଶ କରିଛନ୍ତି। ଏକ ସାମ୍ବାଦିକ ସମ୍ମିଳନୀରେ ସେ ଏହି ସୂଚନା ଦେଇଛନ୍ତି । ଭାରତର ଏହି ପଦକ୍ଷେପ ଦେଶ ସାର୍ବଭୌମତ୍ୱ ରକ୍ଷା ପାଇଁ ସହାୟକ ହେବ ବୋଲି ସେ ସୂଚନା ଦେଇଛନ୍ତି।
ସୂଚନାଯୋଗ୍ୟ କେନ୍ଦ୍ର ସରକାର ଗତ ସୋମବାରରେ ୫୯ ଚାଇନିଜ୍ ଆପ୍ସରେ ପ୍ରତିବନ୍ଧକ ଲଗାଇ ଦେଇଛନ୍ତି । ଏହି ଆପ୍ସ ଲିଷ୍ଟରେ ଟିକଟକ୍ ଓ ୟୁସି ବ୍ରାଉଜର ଆଦି ସାମିଲ । କହିରଖୁଛୁ ନିକଟରେ ଭାରତ ଓ ଚାଇନା ମଧ୍ୟରେ ହୋଇଥିବା ହିଂସା ମଧ୍ୟରେ ଭାରତୀୟ ସେନାର ୨୦ ଜବାନ ଶହୀଦ ହୋଇଥିଲେ । ଏହା ପରେ ଦେଶ ଚୀନ୍ ଉପରେ ବହୁତ ଖପ୍ପା ଥିଲା । ଦେଶବାସୀ ଚୀନ୍ ସାମଗ୍ରୀ ବ୍ୟାନ୍ କରିବା ପାଇଁ ନାରା ଲଗାଉଥିଲେ । ଚୀନ୍ ସାମଗ୍ରୀ ବହିଷ୍କାର ପାଇଁ ଦାବି ହୋଇ ଆସୁଥିଲା ।
ଭାରତରେ ୫୯ଟି ଚାଇନିଜ୍ ଆପ୍ ଉପରେ ପ୍ରତିବନ୍ଧକ ଲଗାଯିବା ପରେ ଚୀନ୍ ସରକାରଙ୍କ ମୁଖପତ୍ର ଗ୍ଲୋବାଲ୍ ଟାଇମ୍ସର ସମ୍ପାଦକ ହୁ ସିଜିନ ଟ୍ୱିଟ୍ କରି କହିଛନ୍ତି ଯେ ଯଦି ଚୀନ୍ ଲୋକମାନେ ଭାରତୀୟ ସାମଗ୍ରୀକୁ ବହିଷ୍କାର କରିବାକୁ ବି ଚାହାଁନ୍ତି, ତେବେ ସେମାନେ ଅଧିକ ଭାରତୀୟ ସାମଗ୍ରୀ ପାଇବେ ନାହିଁ। ଏହା ପରେ ସେ ‘ଭାରତୀୟ ବନ୍ଧୁମାନଙ୍କୁ ଚେତାବନୀ ଦେବାକୁ ଚେଷ୍ଟା କରିଥିଲେ ଯେ ଜାତୀୟତା ଅପେକ୍ଷା ଅନ୍ୟ ଜିନିଷ ଉପରେ ଧ୍ୟାନ ଦେବା ଆବଶ୍ୟକତା ରହିଛି।
ଚୀନ୍ ସରକାରଙ୍କ ମୁଖପତ୍ର ଗ୍ଲୋବାଲ୍ ଟାଇମ୍ସରେ ଏକ ଆର୍ଟିକିଲ୍ ମଧ୍ୟ ପ୍ରକାଶ ପାଇଛି ଯେଉଁଥିରେ ଭାରତରେ ଜାତୀୟତାର ବୃଦ୍ଧି ବ୍ୟବସାୟକୁ କ୍ଷତି ପହଞ୍ଚାଇବ ବୋଲି ଆଶଙ୍କା କରାଯାଇଛି। ଗ୍ଲୋବାଲ ଟାଇମ୍ସ ଲେଖିଛି କି, “ଚୀନ୍ ବିରୋଧରେ ଭାରତରେ ବଢୁଥିବା ଜାତୀୟତାର ଉତ୍ତାପ ବର୍ତ୍ତମାନ ଆର୍ଥିକ କ୍ଷେତ୍ରରେ ପହଞ୍ଚିଛି। କରୋନା ଭାଇରସ ମହାମାରୀର ସଙ୍କଟ ଏବଂ ଭାରତ-ଚୀନ୍ ମଧ୍ୟରେ ଚାଲିଥିବା ତିକ୍ତତା କାରଣରୁ ଦୁଇ ଦେଶ ମଧ୍ୟରେ ବାଣିଜ୍ୟରେ ୩୦% ରୁ ଅଧିକ ହ୍ରାସ ହୋଇପାରେ।
ଯଦି ଭାରତ ଏବଂ ଚୀନ୍ ମଧ୍ୟରେ କମ୍ ବାଣିଜ୍ୟ ଅଛି, ତେବେ ଏହା ଚୀନ୍ ଉପରେ ଅଧିକ ପ୍ରଭାବ ପକାଇବ। ଚୀନ୍ ସହିତ ଭାରତ ବାଣିଜ୍ୟ ନିଅଣ୍ଟ ସ୍ଥିତିରେ ଅଛି, ଅର୍ଥାତ୍ ଏହା ଚୀନ୍ ଠାରୁ ଅଧିକ ଆମଦାନୀ କରେ ଏବଂ ରପ୍ତାନି କମ୍ ଅଟେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଚୀନ୍ ସହିତ ତାଙ୍କର ବାଣିଜ୍ୟ ନିଅଣ୍ଟ ବିଷୟରେ ଉଲ୍ଲେଖ କରି କହିଛନ୍ତି ଯେ ଯଦି ଚୀନ୍ ସହିତ ଏହାର ସମ୍ପର୍କ ଶେଷ ହୁଏ ତେବେ ଆମେରିକା ଉପକୃତ ହେବ। ଦୁଇ ଦେଶ ମଧ୍ୟରେ ବାଣିଜ୍ୟ ସମ୍ଭାବନାକୁ ନେଇ ଚୀନ୍ ଅଧିକ ଚିନ୍ତିତ ହେବାର ଏହି କାରଣ।