ହଟଷ୍ଟାର୍ରେ ରିଲିଜ୍ ହେବ ‘ଲକ୍ଷ୍ମୀ ବମ୍’!
ମୁମ୍ବାଇ:- ଅଭିନେତା ଅକ୍ଷୟ କୁମାରଙ୍କ ଆଗାମୀ ଫିଲ୍ମ ‘ଲକ୍ଷ୍ମୀ ବମ୍’ ଓଟିଟି ପ୍ଲାଟଫର୍ମରେ ରିଲିଜ୍ ହେବା ନେଇ ବେଶ୍ କିଛି ଦିନ ହେଲା ଚର୍ଚ୍ଚା କରାଯାଉଥିଲା । ସଦ୍ୟତମ ରିପୋର୍ଟ ଅନୁସାରେ ଫିଲ୍ମଟି ହଟଷ୍ଟାର୍ରେ ରିଲିଜ୍ ହୋଇପାରେ। ତାର କିଛି ପୋଷ୍ଟ ପ୍ରଡକ୍ସନ୍ କାମ ବାକି ରହିଛି । ତାହା ଶେଷ ହେବାକୁ ପ୍ରାୟତଃ ମାସେ ଲାଗିବ । ମାସେ ପରେ ତାକୁ ‘ହଟ୍ଷ୍ଟାର’ରେ ରିଲିଜ୍ କରାଇବାକୁ ପ୍ରସ୍ତୁତି ଚାଲିଛି ।ରିପୋର୍ଟରେ ଆହୁରି କୁହାଯାଇଛି ଯେ ଏହାକୁ ଓଟିଟି ପ୍ଲାଟଫର୍ମରେ ରିଲିଜ୍ କରିବାକୁ ପ୍ରଥମେ ଫିଲ୍ମର କିଛି ସଦସ୍ୟ ରାଜି ନଥିଲେ । ହେଲେ ଅନ୍ୟ କୌଣସି ଉପାୟ ନ ମିଳିବାରୁ ସେମାନେ ଅନଲାଇନ୍ ରିଲିଜ୍ ପାଇଁ ରାଜି ହୋଇଛନ୍ତି । ଏପରିକି ଫିଲ୍ମଟିକୁ ୧୨୫ କୋଟି ଟଙ୍କାରେ ଓଟିଟି ପ୍ଲାଟଫର୍ମରେ ବିକ୍ରି କରାଯାଇଥିବାର କୁହାଯାଉଛି । ସୂଚନାଥାଉକି, ‘ଲକ୍ଷ୍ମୀ ବମ୍’ରେ ଅକ୍ଷୟ କୁମାରଙ୍କ ବିପକ୍ଷରେ ଅଛନ୍ତି କିଆରା ଆଡଭାନୀ । ଏହା ତାମିଲ ଫିଲ୍ମ ‘କଞ୍ଚନା’ର ହିନ୍ଦୀ ରିମେକ୍ । ଏହି ବହୁଚର୍ଚ୍ଚିତ ଫିଲ୍ମଟିକୁ ପ୍ରଥମେ ମେ ୨୨ ତାରିଖରେ ରିଲିଜ୍ କରାଇବାକୁ ଯୋଜନା ରହିଥିଲା । ହେଲେ ଲକଡାଉନ୍ ଯୋଗୁ ତାକୁ ଅନଲାଇନ୍ରେ ରିଲିଜ୍ କରିବା ଲାଗି ସିଦ୍ଧାନ୍ତ ନିଆଯାଇଛି ।