ପୁଣି ନିରଞ୍ଜନଙ୍କ ବିରୋଧରେ ଏକାଠି ହେଲେ ଅସନ୍ତୁଷ୍ଟ

ଭୁବନେଶ୍ୱର:- କଂଗ୍ରେସରେ ପୁଣି ଉଠିଲା ନେତୃତ୍ୱ ପରିବର୍ତ୍ତନ ଦାବି । ପିସିସି ସଭାପତିଙ୍କ ବିରୋଧରେ ଏକାଠି ହେଲେ ଅସନ୍ତୁଷ୍ଟ । ପ୍ରଦେଶ କଂଗ୍ରେସ ପ୍ରଭାରୀ ଚେଲ୍ଲା କୁମାରଙ୍କ ନିକଟରେ ସେମାନେ ନିଜ ଅସନ୍ତୋଷ ଜାହିର କରିଛନ୍ତି । କଂଗ୍ରେସର ପୁନରୁଦ୍ଧାର ପାଇଁ ପିସିସି ସଭାପତି ପରିବର୍ତ୍ତନ ଜରୁରୀ । ୨୦୧୯ ସାଧାରଣ ନିର୍ବାଚନରେ ଦଳର ଭୋଟ୍ ହାର ୨୬ରୁ ୧୩ ପ୍ରତିଶତକୁ କମିଛି । ବିଧାନସଭାରେ ସଦସ୍ୟ ସଂଖ୍ୟା ସର୍ବନିମ୍ନ ୯କୁ ହ୍ରାସ ପାଇଛି । ଜିଲ୍ଲା ପରିଷଦ ଉପନିର୍ବାଚନରେ ଦଳର ପ୍ରଦର୍ଶନ ନୈରାଶ୍ୟଜନକ । ଗତ ୨ ବର୍ଷରେ ହଜାର ହଜାର କର୍ମୀ ଦଳ ଛାଡ଼ିଛନ୍ତି ।ଦୁଇଟି ଆସନରୁ ହାରି ନିରଞ୍ଜନ ନୈତିକ ଦାୟିତ୍ୱ ନେଇଛନ୍ତି । ନିଜ ଆଡ଼ୁ ସେ ପିସିସି ସଭାପତି ପଦରୁ ଇସ୍ତଫା ଦେବା କେବଳ ଲୋକ ଦେଖାଣିଆ । ଆଗକୁ ପିପିଲି ଉପନିର୍ବାଚନ ସହ ପୌର ଓ ପଞ୍ଚାୟତ ନିର୍ବାଚନ ରହିଛି । କଂଗ୍ରେସର ଭବିଷ୍ୟତ ପାଇଁ ନେତୃତ୍ୱ ବଦଳାଇବାକୁ ଅସନ୍ତୁଷ୍ଟ ନେତାମାନେ ଦାବି କରିଛନ୍ତି । ପୂର୍ବତନ ବିଧାୟକ ଦେବେନ୍ଦ୍ର ଶର୍ମା ଓ ଅନ୍ୟମାନେ ଲିଖିତ ଭାବରେ ଏହା ପିସିସି ପ୍ରଭାରୀଙ୍କୁ ଜଣାଇବା ସହ ହାଇକମାଣ୍ଡଙ୍କ ସହ କଥା ହେବେ ବୋଲି କହିଛନ୍ତି ।