ଓଟିଟି ପ୍ଲାଟଫର୍ମରେ ରିଲିଜ୍ ହେଲା ‘ଗୁଲାବୋ ସିତାବୋ’ର ଟ୍ରେଲର୍
ମୁମ୍ବାଇ :-ଓଟିଟି ପ୍ଲାଟଫର୍ମରେ ମୁକ୍ତି ପାଇବାକୁ ଥିବା ପ୍ରଥମ ଫିଲ୍ମର ଟ୍ରେଲର୍ । ଶେଷରେ ମୁକ୍ତି ପାଇଛି ସୁଜିତ ସରକାରଙ୍କ ଫିଲ୍ମ ‘ଗୁଲାବୋ ସିତାବୋ’ର ଟ୍ରେଲର୍ । ବଡ଼କଥା ହେଲା ରିଲିଜ୍ ହେବାର ମାତ୍ର ଅଧଘଣ୍ଟା ମଧ୍ୟରେ ଲକ୍ଷାଧିକ ଦର୍ଶକ ଏହାକୁ ଦେଖିଛନ୍ତି । ଗୋଟିଏ ପଟେ ଅମିତାଭ ବଚ୍ଚନ ଏବଂ ଆୟୁଷ୍ମାନ ଖୁରାନାଙ୍କ ଭଳି ଅଭିନେତାଙ୍କ ଦମଦାର ଅଭିନୟ ଆଉ ଆରପଟେ ସୁଜିତ ସରକାରଙ୍କ ବିଚକ୍ଷଣ ନିର୍ଦ୍ଦେଶନା । ସତେ ଯେମିତି ପ୍ରଶଂସକମାନେ ହାତରେ ମୋବାଇଲ୍ ଧରି ଟ୍ରେଲର୍ ଦେଖିବା ପାଇଁ ଆଗରୁ ପ୍ରସ୍ତୁତ ଥିଲେ ।
ସେହି କାରଣରୁ ବୋଧହୁଏ ଅଧ ଘଣ୍ଟା ମଧ୍ୟରେ ଏହି ଫିଲ୍ମର ଟ୍ରେଲର୍ ଭିଉଜ୍ ୧ ଲକ୍ଷ ଟପିଗଲା । ଲାଇକ୍ ୧୧ ହଜାରରୁ ଅଧିକ। ଆୟୁଷ୍ମାନ ଏବଂ ଅମିତାଭଙ୍କ ରସାୟନ ଦର୍ଶକଙ୍କୁ କିମିଆ କରିଛି । ଅଭିତାଭଙ୍କ ଚରିତ୍ର ଘରମାଲିକ, ନିଃସନ୍ତାନ, ଟିକେ ଚିଡଚଡ଼ା ସ୍ୱଭାବର । କିନ୍ତୁ ନିଜ ଘର ପ୍ରତି ତାଙ୍କର ଅସମ୍ଭବ ଭଲପାଇବା ରହିଛି । ଘର ବିକ୍ରି କଥା ଶୁଣିଲା ମାତ୍ରେ ଚିହିଁକି ଉଠୁଛନ୍ତି ସେ ।
ଅନ୍ୟ ପଟେ ଆୟୁଷ୍ମାନ ତାଙ୍କ ଭଡ଼ାଟିଆ । ଅମିତାଭଙ୍କ ସହିତ ତାଙ୍କର ସବୁଦିନ ଛୋଟ ଛୋଟ କଥାକୁ ନେଇ ଯୁକ୍ତିତର୍କ ହୋଇଥାଏ । ଆୟୁଷ୍ମାନ ଯଦି କେବେ ତାଙ୍କ ଘର ବିକ୍ରି କରିବା କଥା କହିଥାଆନ୍ତି ତେବେ ରାଗରେ ନିଆଁ ହୋଇଯାଆନ୍ତି ଅମିତାଭ । ଏହାପରେ କାହାଣୀଟି କିଭଳି ଗତିଶୀଳ ହେଉଛି ତାହା ଦେଖିବା ପାଇଁ ଆପଣଙ୍କୁ ଆସନ୍ତା ଜୁନ ୧୨ତାରିଖ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ ।