ଏପ୍ରିଲରୁ ଆଉ ରବିବାର ସ୍କୁଲରେ ହେବନାହିଁ ପାଠପଢ଼ା

ଭୁବନେଶ୍ୱର: ପାଖେଇ ଆସୁଛି ପରୀକ୍ଷା । ମାଟ୍ରିକ୍ ଓ ପ୍ଲସ ଟୁ ପରୀକ୍ଷା ପାଖେଇ ଆସୁଥିବା ବେଳେ ସ୍କୁଲରେ ପ୍ରାୟତଃ ପାଠ୍ୟକ୍ରମ ଶେଷ ହୋଇ ଆସିଲାଣି । ନିୟମିତ ଶ୍ରେଣୀଗୃହ ଶିକ୍ଷାଦାନର ଆଉ ଆବଶ୍ୟକତା ନାହିଁ । ମାର୍ଚ୍ଚ ସରୁ ସରୁ ସବୁ ପାଠ୍ୟକ୍ରମ ଶେଷ ହୋଇଯିବ । ଏପ୍ରିଲରୁ ରିଭିଜନ କ୍ଲାସ୍ ହେବ ବୋଲି କହିଛନ୍ତି ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ।

ତେଣୁ ରିଭିଜନ୍ କ୍ଲାସ୍ ବେଳେ ରବିବାର ଆଉ ସ୍କୁଲରେ ପାଠପଢ଼ା ହେବନାହିଁ । ରବିବାର ଛୁଟି ରହିବ ବୋଲି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ କହିଛନ୍ତି । ପିଲାଙ୍କ ସଂଖ୍ୟା ମଧ୍ୟ ସ୍କୁଲରେ ଏବେ ଧୀରେ ଧୀରେ କମିବାକୁ ଲାଗିଥିବାରୁ ଏବେ ସେଲ୍ଫ ଷ୍ଟଡି ଉପରେ ଗୁରୁତ୍ୱ ଦିଆଯାଉଛି ବୋଲି କହିଛନ୍ତି ଗଣଶିକ୍ଷା ମନ୍ତ୍ରୀ ।

ମାଧ୍ୟମିକ ଶିକ୍ଷା ପରିଷଦର ବିଜ୍ଞପ୍ତି ଅନୁସାରେ ମେ’ ୩ରୁ ୧୫ ପର୍ଯ୍ୟନ୍ତ ମାଟ୍ରିକ ପରୀକ୍ଷା ହେବ । ସକାଳ ୮ଟାରୁ ୧୦ଟା ପର୍ଯ୍ୟନ୍ତ ପରୀକ୍ଷା ହେବା ନେଇ କାର୍ଯ୍ୟସୂଚୀ ଜାରି ହୋଇଛି । ଉଭୟ ରେଗୁଲାର ଏବଂ ଏକ୍ସରେଗୁଲାର ପରୀକ୍ଷାର୍ଥୀଙ୍କ ପାଇଁ ଗୋଟିଏ ପ୍ରଶ୍ନପତ୍ର ରହିଥିବା ନେଇ ମଧ୍ୟ ସ୍ପଷ୍ଟ କରିଛି ବିଭାଗ । ନିର୍ଦ୍ଦେଶନାମା ଅନୁଯାଯୀ ୭ଟା ୪୫ରେ ପରୀକ୍ଷା କକ୍ଷରେ ପ୍ରବେଶ କରିବେ ଛାତ୍ରଛାତ୍ରୀ । ପରେ ସେମାନଙ୍କୁ ପ୍ରଶ୍ନପତ୍ର ବଣ୍ଟାଯିବ । ପ୍ରଥମେ ଛାତ୍ରଛାତ୍ରୀ ୮ଟାରୁ ୯ଟା ପର୍ଯ୍ୟନ୍ତ ଅବଜେକ୍ଟିଭ ପରୀକ୍ଷା ଦେବେ । ଏବଂ ପରବର୍ତ୍ତୀ ସମୟ ଅର୍ଥାତ ୯ଟାରୁ ୧୦ଟା ଭିତରେ ସବଜେକ୍ଟିଭ ପରୀକ୍ଷା ଦେବା ନେଇ ମାଧ୍ୟମିକ ଶିକ୍ଷା ପରିଷଦ ବିଜ୍ଞପ୍ତି ଜାରି କରିଛି ।