ଫୁଲ ପ୍ରେମରେ ପାଗଳ ଗୟାଧର, ପେଶାରେ ମାଛ ବ୍ୟବସାୟୀ, ନିଶା ଫୁଲ ଗଛ ଲଗାଇବା

ଜଗତସିଂହପୁର: ଫୁଲ ପ୍ରେମରେ ପାଗଳ ଗୟାଧର । ପେଶାରେ ଜଣେ ମାଛ ବ୍ୟବସାୟୀ । ହେଲେ ନିଶା ତାଙ୍କର ଫୁଲ ଗଛ ଲଗାଇବା । ଦିନରେ ଟିକିଏ ଫୁରସତ ମିଳିବା ମାତ୍ରେ ନିଜ ବଗିଚାର ସଫାସୁତରା କାର୍ଯ୍ୟରେ ଲାଗିପଡନ୍ତି । ଗଛରେ ପାଣି ଦେବା, ଔଷଧ, ସାର ଆଦି ଦେଇ ଗଛ ସେବାରେ ଲାଗି ସମୟ କାଟିଥାନ୍ତି ।

ବଗିଚାରେ ପରିଣତ ହୋଇଛି ଘର ଛାତ ଓ ବାଡ଼ି । ସୁନ୍ଦର ସୁନ୍ଦର ଫୁଲ ଗଛ ଘର ଅଗଣାର ଶୋଭା ମଣ୍ଡନ କରୁଛି । ଗେଣ୍ଡୁ ଗୋଲାପ ସାଙ୍ଗକୁ ସେବତୀ, ମାଳତୀ ଫୁଲ, ଏକ ପ୍ରାକୃତିକ ପରିବେଶ ସୃଷ୍ଟି କରୁଛି । ଜଗତସିଂହପୁର ଜିଲ୍ଲା ପାରାଦୀପ ଗଡ଼ ପଞ୍ଚାୟତ ନିମିଢି ଗାଁର ଗୟାଧର ତରାଇ । ତାଙ୍କର ପ୍ରକୃତି ପ୍ରେମ ଓ ନିଆରା ପ୍ରୟାସ ଯୋଗୁଁ ଘର ଭିତରେ ଓ ଛାତ ଲାଗୁଛି ବଗିଚା ।ନିଜ ଛାତରେ ୨୦ରୁ ୨୫ ପ୍ରକାର ଫୁଲ ଗଛ ଲଗାଇଛନ୍ତି ଗୟାଧର । ଦିନରେ ଟିକିଏ ଫୁରସତ୍ ମିଳିଲେ ସେ ବଗିଚା କାମରେ ଲାଗନ୍ତି ।  ପାରାଦୀପ ରିଫାଇନାରୀ ଟାଉନସିପର ଫ୍ଲାୱାର ସୋ’ରେ ସ୍ଥାନ ମଧ୍ୟ ପାଇଛି ଗୟାଧରଙ୍କ ଫୁଲ । ଆଉ ୫ ବର୍ଷ ହେଲା ପ୍ରଥମ ସ୍ଥାନ ଅଧିକାର କରୁଛନ୍ତି ଗୟାଧର ।