କରୋନାରେ ସିମୁଳିଆ ବିଡିଓଙ୍କ ମୃତ୍ୟୁ
ସିମୁଳିଆ:- ବାଲେଶ୍ୱର ଜିଲ୍ଲା ସିମୁଳିଆ ବ୍ଲକ୍ ବିଡିଓ ଡ. ନରହରି ବେହେରା (୫୬)ଙ୍କ ବୁଧବାର ଦେହାନ୍ତ ହୋଇଯାଇଛି । କରୋନାରେ ଆକ୍ରାନ୍ତ ହୋଇ ଡ. ବେହେରା ଭୁବନେଶ୍ୱରର ସମ୍ କୋଭିଡ ହସପିଟାଲରେ ଚିକିତ୍ସାଧୀନ ଥିଲେ । ତାଙ୍କର ମଧୁମେହ ରୋଗ ମଧ୍ୟ ଥିଲା । ଜଣେ ସୁସାହିତ୍ୟିକ ତଥା ବିଶିଷ୍ଟ ସ୍ତମ୍ଭକାର ଭାବେ ଡ. ବେହେରାଙ୍କର ବେଶ୍ ଖ୍ୟାତି ଥିଲା । ତାଙ୍କ ମୃତ୍ୟୁରେ ସିମୁଳିଆ ଅଞ୍ଚଳ ସମେତ ସାହିତ୍ୟିକଙ୍କ ମହଲରେ ଶୋକର ଛାୟା ଖେଳି ଯାଇଛି ।
ସୂଚନା ଅନୁସାରେ, ଗତ ୨ ତାରିଖରେ ବିଡିଓ ଡ. ବେହେରା କରୋନାରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା । ତେଣୁ ତାଙ୍କୁ ପ୍ରଥମେ ଭଦ୍ରକ ସାଳନ୍ଦୀ କୋଭିଡ୍ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କର ସ୍ୱାସ୍ଥ୍ୟାବସ୍ଥା ବିଗିଡ଼ିବାରୁ ତାଙ୍କୁ ଭୁବନେଶ୍ୱର ସମ୍ କୋଭିଡ ମେଡିକାଲକୁ ସ୍ଥାନାନ୍ତର କରାଯାଇଥିଲା । ସେଠାରେ ବୁଧବାର ଅପରାହ୍ନରେ ତାଙ୍କର ମୃତ୍ୟୁ ଘଟିଥିଲା ।
ସୂଚନାଯୋଗ୍ୟ, ଡ. ବେହେରା ୨୦୧୮ ଅଗଷ୍ଟ ୧୬ରେ ସିମୁଳିଆର ବିଡିଓ ଭାବେ ଯୋଗ ଦେଇଥିଲେ । ଜଣେ ଦକ୍ଷ ପ୍ରଶାସକ ଭାବେ ସିମୁଳିଆରେ ବହୁ ଉନ୍ନୟନ କାର୍ଯ୍ୟ କରି ସେ ସୁନାମ ଅର୍ଜନ କରିଥିଲେ ।