ଦୁର୍ବୃତ୍ତଙ୍କ ଆକ୍ରମଣରେ ସୁରେଶ ରୈନାଙ୍କ ପିଉସାଙ୍କର ମୃତ୍ୟୁ
ପଠାନକୋଟ: – ଚେନ୍ନାଇ ସୁପର କିଙ୍ଗସ୍( ସିଏସ୍କେ)ର ଅଲ୍ ରାଉଣ୍ଡର ସୁରେଶ ରୈନା ନିଜର ବ୍ୟକ୍ତିଗତ କାରଣ ପାଇଁ ଶନିବାର ୨୮ ଅଗଷ୍ଟରେ ୟୁଏଇରୁ ଭାରତକୁ ଫେରି ଆସିଛନ୍ତି । ସେ ପୁରା ଆଇପିଏଲ୍ ୨୦୨୦ ସଂସ୍କରଣ ଖେଳିବେ ନାହିଁ । ଏମିତି ହଠାତ୍ କେଉଁ କାରଣ ପାଇଁ ସେ ଭାରତକୁ ଫେରିଆସିଲେ ବୋଲି କ୍ରିକେଟ୍ ପ୍ରେମୀଙ୍କ ମଧ୍ୟରେ ଭାବନା ସୃଷ୍ଟି ହୋଇଛି ।
ଜାଗରଣ ଡଟ୍ କମ୍ର ରିପୋର୍ଟ ମୁତାବକ , ରୈନାଙ୍କ ସଂପର୍କୀୟ ଏବେ ଗୁରୁତର ଅବସ୍ଥାରେ । ପଠାନକୋଟରେ ଥାରିୟାଲ ଗାଁରେ କିଛି ଦୁର୍ବୃତ୍ତଙ୍କ ଆକ୍ରମଣରେ ତାଙ୍କର ପିଉସା ଅଶୋକ କୁମାର( ୫୮)ଙ୍କ ମୃତ୍ୟୁ ହୋଇଛି । ତାଙ୍କର ବାପାଙ୍କ ଭଉଣୀ ଆଶା ଦେବୀ ଅର୍ଥାତ୍ ରୈନାଙ୍କର ପିଉସୀ ଅତ୍ୟନ୍ତ ଗୁରୁତର ଅବସ୍ଥାରେ ଅଛନ୍ତି । ସେ ଜୀବନ-ମୃତ୍ୟୁର ସଂଘର୍ଷ କରୁଛନ୍ତି । ସେପଟେ ରୈନାଙ୍କର ଦୁଇ ସଂପର୍କୀୟ ଭାଇ କୌଶଲ କୁମାର ଓ ଅପିଲ୍ କୁମାର ଏହି ଭୟଙ୍କର ଆକ୍ରମଣରେ ଆହତ ହୋଇଛନ୍ତି । ଏହି ଆକ୍ରମଣ ୧୯ ଅଗଷ୍ଟ ରାତିରେ ଘଟିଥିଲା । ସେତେବେଳେ ପୁରା ପରିବାର ତାଙ୍କ ଘରର ଛାତ ଉପରେ ଶୋଇଥିଲେ । କିଛି ଅଜଣା ବ୍ୟକ୍ତି ହାତରେ ମାରଣାସ୍ତ୍ର ଧରି ତାଙ୍କୁ ଆକ୍ରମଣ କରିଥିଲେ ।