ଜୁଲାଇରେ ଓଡ଼ିଶାରେ ପହଞ୍ଚିବେ ପଙ୍ଗପାଳ !

ଭୁବନେଶ୍ୱର: ଉତ୍ତର ଓ ପଶ୍ଚିମ ଭାରତରେ ଧ୍ୱଂସଲୀଳା ରଚିଥିବା ପାକିସ୍ତାନୀ ପଙ୍ଗପାଳ ଦଳ ଓଡ଼ିଶା ଆସିବେ କି ନାହିଁ ତାହା ଆଉ ୪, ୫ ଦିନ ପରେ ଜଣାପଡ଼ିବ । ତେବେ ସେମାନଙ୍କ ଗତିବିଧି ଉପରେ ରାଜ୍ୟ ସରକାର ନଜର ରଖିଛନ୍ତି । ଏହାସହ ଆଜି ସକାଳେ କେନ୍ଦ୍ରୀୟ ସମନ୍ୱିତ କୀଟ ପରିଚାଳନା କେନ୍ଦ୍ର-CIPMs ସହ ଏନେଇ ଆଲୋଚନା ହୋଇଛି ବୋଲି ରାଜ୍ୟ କୃଷି ନିର୍ଦ୍ଦେଶକ ଏମ୍. ମୁଥୁକୁମାର କହିଛନ୍ତି ।

ସୂଚନା ଅନୁଯାୟୀ ପଙ୍ଗପାଳ ଏବେ ମଧ୍ୟପ୍ରଦେଶର ସତନା ଓ ଏହାର ଆଖପାଖ ଅଞ୍ଚଳରେ ଅଛନ୍ତି । ପଙ୍ଗପାଳ ଦୁର୍ବଳ ଅବସ୍ଥାର ଥିବାବେଳେ ଏବେସୁଦ୍ଧା ଛତିଶଗଡ଼ ଆସିନାହାନ୍ତି । ଏଣୁ ଆଉ ୫ ଦିନ ଅପେକ୍ଷା କରାଯାଉଛି ବୋଲି ମୁଥୁକୁମାର କହିଛନ୍ତି ।

ତେବେ ଖାଦ୍ୟ ଓ କୃଷି ସଂଗଠନର ସୂଚନା ଅନୁସାରେ ନୂଆ ପଙ୍ଗପାଳ ଦଳ ଜୁଲାଇରେ ଓଡ଼ିଶା ଆସିପାରନ୍ତି । ଏ ନେଇ କେନ୍ଦ୍ର ସରକାର ମାର୍ଗଦର୍ଶିକା ଦେବା ପରେ ପଦକ୍ଷେପ ନିଆଯିବ ବୋଲି ସେ କହିଛନ୍ତି।