ଜଙ୍ଗଲକୁ କାଠ ସଂଗ୍ରହ ପାଇଁ ଆସିଥିବା ଯୁବତୀଙ୍କୁ ଦୁଷ୍କର୍ମ ପରେ ହତ୍ୟା ଅଭିଯୋଗ

ଭୁବନେଶ୍ୱର:-ଜଙ୍ଗଲକୁ କାଠ ସଂଗ୍ରହ ପାଇଁ ଯାଇଥିବା ଯୁବତୀଙ୍କୁ ଦୁଷ୍କର୍ମ ପରେ ହତ୍ୟା କରାଯାଇଥିବା ଅଭିଯୋଗ ହୋଇଛି । ମିଳିଥିବା ସୂଚନା ଅନୁସାରେ ଘଟଣାସ୍ଥଳରୁ ଅଳ୍ପ ଦୂରରେ ହିଁ ଯୁବତୀଙ୍କ ଘର । ମାସକ ତଳେ ବାପା, ମା ଦାଦନ ଖଟିବାକୁ ବାହାରକୁ ଚାଲି ଯାଇଥିଲେ । ତେଣୁ ଦୁଇ ଭାଇ ଭଉଣୀ ଓଇ ଆଈଙ୍କ ସହ ଯୁବତୀ ରହୁଥିଲେ । ୩ଦିନ ତଳେ ଅର୍ଥାତ ୩ତାରିଖ ସନ୍ଧ୍ୟାରେ କାଠ ସଂଗ୍ରହ କରିବାକୁ ନିକଟସ୍ଥ ଜଙ୍ଗଲକୁ ଯାଇଥିଲେ ଯୁବତୀ । ଆଉ ଏହାପରେ ସେ ଘରକୁ ନଫେରିବାରୁ ପରିବାର ଲୋକେ ଖୋଜାଖୋଜି କରିବା ପରେ ମଧ୍ୟ ତାଙ୍କ ପତା ମିଳିନଥିଲା ।ଗତକାଲି ନୀଳଗିରି ଜଙ୍ଗଲକୁ କିଛି ମହିଳା କାଠ ସଂଗ୍ରହ କରିବାପାଇଁ ଯାଇଥିବା ବେଳେ ଏକ ମୋବାଇଲ ଫୋନ ପଡିଥିବା ଦେଖିବାକୁ ପାଇଥିଲେ । ସନ୍ଦେହ ହେବାରୁ ଖୋଜାଖୋଜି କରିବା ପରେ ଯୁବତୀଙ୍କ ଅର୍ଦ୍ଧନଗ୍ନ ଶବ ବୁଦା ଭିତରେ ପଡିଥିବା ଦେଖିଥିଲେ । ଶରୀରରେ ଗଭୀର କ୍ଷତ ରହିଥିବା ବେଳେ ଚୁଟି ପୋଡି ଦେଇଥିବା ଦେଖିବାକୁ ମିଳିଥିଲା । ଶବ ନିକଟସ୍ଥ ଗାଁର ଯୁବତୀଙ୍କ ବୋଲି ଚିହ୍ନଟ ହେବା ପରେ ସମ୍ପର୍କୀୟଙ୍କୁ ଖବର ଦେଇଥିଲେ । ବୋରିଗୁମା ଏସଡିପି ଓ ଥାନା ଅଧିକାରୀ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଥିଲେ । ପାରିପାର୍ଶ୍ୱିକ ସ୍ଥିତିରୁ ଯୁବତୀଙ୍କୁ ଦୁଷ୍କର୍ମ ଓ ହତ୍ୟା କରାଯାଇଥିବା ପୋଲିସ ଅନୁମାନ କରୁଛି ।