ରକ୍ଷକ ସାଜିଲା ଭକ୍ଷକ: ଡ୍ୟୁଟି ବେଳେ ଲୁଟ୍ କରି ବନ୍ଧା ହେଲେ ୩ ହୋମଗାର୍ଡ
କଟକ :- ରକ୍ଷକ ସାଜିଲେ ଭକ୍ଷକ। ଯେଉଁଠି ସାଧାରଣ ଲୋକଙ୍କୁ ସୁରକ୍ଷା ଦେବା ସେମାନଙ୍କ ଦାୟିତ୍ଵ, ସେଠି ଓଲଟା ଲୋକଙ୍କଠୁ ଲୁଟ୍ କରିଛନ୍ତି ହୋମଗାର୍ଡ। ରାତିରେ ଡ୍ୟୁଟି କରିବା ସମୟରେ ଜଣେ ବ୍ୟକ୍ତିଙ୍କ ଠାରୁ ଲୁଟ୍ କରିବା ଅଭିଯୋଗରେ ତିନି ଜଣ ହୋମଗାର୍ଡଙ୍କୁ ଗିରଫ କରି କୋର୍ଟ ଚାଲାଣ କରିଛି ବାଦାମବାଡି ଥାନା ପୋଲିସ।
ଗତ ଦୁଇ ଦିନ ତଳେ ଜଣେ ବ୍ୟକ୍ତି ରାତିରେ ମେଡିକାଲ ଯାଉଥିବା ସମୟରେ କଟକ ଦୋଳମୁଣ୍ଡାଇ ଅଞ୍ଚଳରେ ଡ୍ୟୁଟି କରୁଥିବା ହୋମଗାର୍ଡ ଚନ୍ଦନ ପରିଡାଙ୍କ ସହ ପୁରୀଘାଟ ଥାନାର ଅନ୍ୟ ଦୁଇ ହୋମଗାର୍ଡ ସେହି ବ୍ୟକ୍ତି ଜଣଙ୍କୁ ଅଟକାଇଥିଲେ। କାହିଁକି ମାସ୍କ ପିନ୍ଧି ନ ବୋଲି ପଚାରିଥିଲେ। ପରେ ତାଙ୍କ ଠାରୁ ପାଞ୍ଚ ଶହ ଟଙ୍କା ନେଇଥିଲେ।
ହେଲେ ସେହି ବ୍ୟକ୍ତିଙ୍କ ପାଖରେ ଅଧିକ ଟଙ୍କା ଥିବା ଜାଣି ପାରି ତାଙ୍କ ଠାରୁ ୨୫ ହଜାର ଟଙ୍କା ଛଡାଇ ନେଇଥିଲେ। ତେବେ ସେହି ବ୍ୟକ୍ତି ଜଣଙ୍କ ଏ ନେଇ ବାଦାମବାଡି ଥାନାରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ତଦନ୍ତ କରି ହୋମଗାର୍ଡ ଚନ୍ଦନ ପରିଡା ସହ ଅନ୍ୟ ଦୁଇ ଅଭିଯୁକ୍ତ ହୋମଗାର୍ଡ ଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି।