ସୁନ୍ଦରଗଡରେ ଟ୍ରେନ୍ ଧକ୍କାରେ ୨ ହାତୀ ମୃତ

ରାଉରକେଲା: ସୁନ୍ଦରଗଡ଼ ବିଶ୍ରା ଥାନା ଅନ୍ତର୍ଗତ ମହିପାଣି ନିକଟରେ ଟ୍ରେନ ଧକ୍କାରେ ଦୁଇଟି ମାଈ ହାତୀଙ୍କ ମୃତ୍ୟୁ ହୋଇଛି। ଏହି ଦୁର୍ଘଟଣା ଗତକାଲି ରାତି ଗୋଟାଏରେ ହୋଇଥିବା ଜଣାପଡିଛି ।

ସୂଚନା ଅନୁଯାୟୀ ୧୪ ଟିକିଆ ହାତୀପଲ ମହିପାଣିରୁ ଝାଡ଼ଖଣ୍ଡ ସଂରଷିତ ଜଙ୍ଗଲକୁ ଯାଉଥିବା ବେଳେ ପାର୍ସଲ ଟ୍ରେନ ଧକ୍କାରେ ଦୁଇ ହାତୀ ପ୍ରାଣ ହରାଇଥିବା ଅଭିଯୋଗ ହୋଇଛି। ମୃତ ଦୁଇ ମାଈ ହାତୀଙ୍କ ମଧ୍ୟରୁ ଗୋଟିଏ ହାତୀ ୧୫ ବର୍ଷରୁ ଅଧିକ ଓ ଅନ୍ୟ ହାତୀଟି ୮ ବର୍ଷରୁ ଅଧିକ ବୟସର ହୋଇଥିବା ବନ ବିଭାଗ ପକ୍ଷରୁ ସୂଚନା ଦିଆଯାଇଛି।

ହାତୀ ମୃତ୍ୟୁ ନେଇ ବନ ବିଭାଗ ପକ୍ଷରୁ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରାଯାଇଛି । ହାତୀପଲ ଯାଉଥିବା ନେଇ ରେଲବାଈ ଵିଭାଗକୁ ବନ ବିଭାଗ ପକ୍ଷରୁ ଅବଗତ କରାଯାଇଥିଲା । ତେବେ ରେଳବାଇ ବିଭାଗ କାହିଁକି ପଦକ୍ଷେପ ନେଇନଥିଲେ, ସେସମ୍ପର୍କରେ ଵନ ଵିଭାଗ ପଷରୁ ତଦନ୍ତ ଆରମ୍ଭ ହୋଇଛି।

ରେଳବାଇ ବିଭାଗର ବରିଷ୍ଠ ଅଧିକାରୀଙ୍କ ସହ ବନ୍ଧମୁଣ୍ଡା ଏଆରଏମ ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିଛନ୍ତି । ରେଳ ଟ୍ରାକରୁ ହାତୀ ମୃତଦେହ ବାହାର କରିବା ସହ ଲାଇନଚ୍ୟୁତ ହୋଇଥିବା ଟ୍ରେନ ବଗି ମରାମତି କରାଯାଇଛି । ଏବେ ଟ୍ରେନ ଚଲାଚଳ ସ୍ବାଭାବିକ ହୋଇଛି ।