ସମ୍ବିତ ପାତ୍ରଙ୍କୁ ଓକିଲ ନୋଟିସ୍ ପଠାଇଲେ ମହମ୍ମଦ ମୋକିମ୍

କଟକ:-ପରୀ ଘଟଣାକୁ ନେଇ ବିଜେପି ଓ କଂଗ୍ରେସ ମଧ୍ୟରେ ରାଜନୈତିକ ବୟାନବାଜି ଜାରି ରହିଛି। ଉଭୟ ଦଳ ପରସ୍ପରକୁ ବିଜେଡିର ସମାନ ବିଚାରଧାରାର ଆରୋପ ଲଗାଉଛନ୍ତି। ଅନ୍ୟପଟେ  ବିଜେପି ରାଷ୍ଟ୍ରୀୟ ପ୍ରବକ୍ତା ଡ ସମ୍ବିତ ପାତ୍ର ୯ ଜଣ କଂଗ୍ରେସ ବିଧାୟକମାନଙ୍କ ବିରୁଦ୍ଧରେ ଅପମାନଜନକ ଓ ଅରୁଚିକର ଶବ୍ଦ ପ୍ରୟୋଗ କରିଥିଲେ। ଏହି ଘଟଣାରେ ବାରବାଟୀ-କଟକ ବିଧାୟକ ମହମ୍ମଦ ମୋକିମ ଚେତାବନୀ ଦେବା ସହ ସମ୍ବିତ ପାତ୍ରଙ୍କ ବିରୁଦ୍ଧରେ ଏକ ଓକିଲ ନୋଟିସ୍ ଜାରି କରିଛନ୍ତି।ମୋକିମ କହିଛନ୍ତି, ପରୀ ଘଟଣାରେ ସମ୍ଵିତ ପାତ୍ର ୯ ଜଣ କଂଗ୍ରେସ ବିଧାୟକଙ୍କ ବିରୁଦ୍ଧରେ ଅରୁଚିକର ଓ ନିରାଧାର ମନ୍ତବ୍ୟ ଦେଇ ଏବଂ ଦଳର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ରାହୁଲ ଗାନ୍ଧୀଙ୍କୁ ଏହି ଘଟଣାକୁ ଟାଣି ନିଜ ହୀନମନ୍ୟତା ଓ ନୀଚମନର ପରିଚୟ ଦେଇଛନ୍ତି। ଡ ପାତ୍ର ଶସ୍ତା ଲୋକପ୍ରିୟତା ପାଇଁ କଂଗ୍ରେସ ବିଧାୟକମାନଙ୍କ ପ୍ରତି ପରୀ ଘଟଣାରେ ପଇସା ଖାଇବା ପରି ଆଶାଳୀନ ଆକ୍ଷେପ କରିବା ତାଙ୍କ ଦୁର୍ବଳ ଓ ହତାଶା ମାନସିକତାର ପରିଚୟ ଦେଇଛନ୍ତି। ଏହି ଘଟଣାରେ ବିଧାୟକ ମହମ୍ମଦ ମୋକିମଙ୍କ ପ୍ରତିଷ୍ଠା ଓ ସମ୍ମାନହାନୀ ଘଟିଛି।