ଘରେ ପଶି ବନ୍ଧୁକ ଦେଖାଇ ଲୁଟିନେଲେ ୫ଲକ୍ଷ ଟଙ୍କା

ସୋର:-ଗ୍ରୀଲ୍ ଭାଙ୍ଗି ଘରେ ପଶିଲେ, ବନ୍ଧୁକ ଦେଖାଇ ଲୁଟିନେଲେ ୫ଲକ୍ଷ ଟଙ୍କାର ସୁନା ଗହଣା । ବାଲେଶ୍ବର ଜିଲ୍ଲା ଖଇରା ଥାନା ନନ୍ଦୁର ପଞ୍ଚାୟତ ବ୍ରହ୍ମଚାରୀ ଗ୍ରାମରେ ରବିବାର ବିଳମ୍ବିତ ରାତିରେ ଲୁଟ୍ ହୋଇଛି । ଗ୍ରୀଲ୍ ଭାଙ୍ଗି ଘରେ ପଶି ବନ୍ଧୁକ ଦେଖାଇ ଲକ୍ଷାଧିକ ଟଙ୍କାର ସୁନା ଗହଣା ଓ ନଗଦ ଟଙ୍କା ଲୁଟିନେଲେ ଦୁର୍ବୃତ୍ତ । ଖଇରା ପୋଲିସ ଘଟଣାର ତଦନ୍ତ ଆରମ୍ଭ କରିଛି ।

ସୂଚନାଯୋଗ୍ୟ ଯେ, ବାଲେଶ୍ବର ଜିଲ୍ଲା ଖଇରା ଥାନା ବ୍ରହ୍ମଚାରୀ ଗ୍ରାମର ଯଦୁନାଥ ବେହେରାଙ୍କ ଘରୁ ଲୁଟ୍ ହୋଇଛି । ମୁହଁରେ କପଡା ବାନ୍ଧି ୧୪ଜଣ ଦୁର୍ବୃତ୍ତ ଆସି ଘରର ଗ୍ରୀଲ୍ ଭାଙ୍ଗି ଭିତରକୁ ପଶିଥିଲେ । ପରେ ଯଦୁନାଥଙ୍କୁ ଏକ ରଶିରେ ବାନ୍ଧି ତାଙ୍କ ବୋହୂଙ୍କୁ ବନ୍ଧୁକ ଏବଂ ଭୁଜାଲି ଦେଖାଇ ଭୟଭୀତ କରାଇ ଗଡ୍ରେଜ ଚାବି ମାଗିଥିଲେ । ଚାବିନେଇ ଗଡ୍ରେଜରେ ଥିବା ନଗଦ ୧୨ ହଜାର ଟଙ୍କା, ସୁନାଗହଣା, ଏଟିଏମ୍ କାର୍ଡ ସମେତ ଏକ ମୋବାଇଲ ଫୋନ୍ ନେଇଯାଇଛନ୍ତି । ଏନେଇ ସୋମବାର ସକାଳେ ଯଦୁନାଥ ଖଇରା ଥାନାରେ ଏକ ଲିଖିତ ଅଭିଯୋଗ କରିଥିଲେ ।