କ୍ରିକେଟକୁ ଅଲିମ୍ପିକରେ ସାମିଲ କରିବାକୁ ଦାବି କଲେ ରାହୁଲ ଦ୍ରାବିଡ
ନୂଆଦିଲ୍ଲୀ :–ଭାରତର ପୂର୍ବତନ କିମ୍ବଦନ୍ତୀ କ୍ରିକେଟର ରାହୁଲ ଦ୍ରାବିଡ କ୍ରିକେଟକୁ ଅଲିମ୍ପିକରେ ସାମିଲ କରିବା ପାଇଁ ପ୍ରସ୍ତାବ ଦେଇଛନ୍ତି । ଅଲିମ୍ପିକରେ କ୍ରିକେଟ ସାମିଲ ହେଲେ ଯେଉଁ ଆହ୍ବାନ ସାମ୍ନାକୁ ଆସିବ ସେ ବାବଦରେ ମଧ୍ୟ କହିଛନ୍ତି ରାହୁଲ ଦ୍ରାବିଡ । ବିଗତ କିଛି ବର୍ଷ ହେଲା କ୍ରିକେଟକୁ ଅଲିମ୍ପିକରେ ସାମିଲ କରିବା ପାଇଁ ଦାବି ହୋଇଆସୁଛି । ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ରାହୁଲ ଦ୍ରାବିଡ ମଧ୍ୟ ଅଲିମ୍ପିକରେ କ୍ରିକେଟକୁ ସାମିଲ କରିବାକୁ ପ୍ରସ୍ତାବ ଦେଇଛନ୍ତି । ଆଇସିସି ୨୦୧୮ରେ ଏହାକୁ ନେଇ ସର୍ଭେ ମଧ୍ୟ କରିଥିଲା ଯେଉଁଥିରେ ୮୭ ପ୍ରତିଶତ ପ୍ରଶଂସକ କ୍ରିକେଟକୁ ଅଲିମ୍ପିକରେ ସାମିଲ କରିବା ସପକ୍ଷରେ ମତଦେଇଥିଲେ ।ବିସିସିଆଇ କିନ୍ତୁ ଅଲିମ୍ପିକକୁ ତାର ଟିମ ପଠାଇବାକୁ ଉତ୍ସୁକ ନାହିଁ । କ୍ରିକେଟକୁ ୨୦୧୦ ଏବଂ ୨୦୧୪ରେ ଏସୀୟ ଖେଳରେ ସାମିଲ କରାଯାଇଥିଲା କିନ୍ତୁ ବିସିସିଆଇ ତାର ଟିମକୁ ପଠାଇନଥିଲା । କିନ୍ତୁ ଅନ୍ୟପଟେ ଦେଖିଲେ ଯଦି କ୍ରିକେଟ ଅଲିମ୍ପିକ କ୍ରୀଡା ହୋଇଯାଏ ତେବେ ପ୍ରାୟ ୭୫ ଦେଶ ଭାଗ ନେଇପାରିବେ ଯେଉଁଠିକି ଟି-ଟ୍ବେଣ୍ଟି କ୍ରିକେଟ ଖେଳାଯାଉଛି । ତେବେ ଦ୍ରାବିଡ କହିଛନ୍ତି ଅଲିମ୍ପିକରେ କ୍ରିକେଟକୁ ସାମିଲ କଲେ ଅନେକ ଗୁଡିଏ ଚ୍ୟାଲେଞ୍ଜର ସାମ୍ନା ମଧ୍ୟ କରିବାକୁ ପଡିବ ।ଦ୍ରାବିଡ ଟି-ଟ୍ବେଣ୍ଟି କ୍ରିକେଟର ବିସ୍ତାର ପାଇଁ ନିଜକୁ ସାମିଲ କରିବାକୁ ପ୍ରସ୍ତୁତ ଥିବା କହିଛନ୍ତି । ଏବେ ଖେଳାଯାଇଥିବା ଆଇପିଏଲ ମ୍ୟାଚର ସଫଳତା ଏବଂ ଯେଉଁଠାରେ ମ୍ୟାଚ ଖେଳାଯାଇଥିଲା ତାକୁ ଦେଖି ସ୍ପଷ୍ଟ ଅନୁମେୟ ଯେ ଅନେକ ଟିମ ଅଲିମ୍ପିକରେ ନିଜର ପରାକାଷ୍ଟା ଦେଖାଇବାକୁ ଚାହୁଁଛନ୍ତି । ଯଦି ସେହିଭଳି ସୁବିଧା ସୁଯୋଗ ଏବଂ ଭିତ୍ତି ଭୂମି ତିଆରି କରାଯାଏ ତେବେ ଅଲିମ୍ପିକରେ କ୍ରିକେଟକୁ ସାମିଲ କରାଯାଇପାରିବ ।