ସାନ ଭାଇର ଟାଙ୍ଗିଆ ଚୋଟରେ ବଡ ଭାଇ ଗୁରୁତର

ହିଞ୍ଜିଳି:-ସାନ ଭାଇର ଟାଙ୍ଗିଆ ଚୋଟରେ ବଡ ଭାଇ ଗୁରୁତର। ଶୁକ୍ରବାର ଅପରାହ୍ନରେ ହିଞ୍ଜିଳି ଥାନା ଖଣ୍ଡରା ଗ୍ରାମରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି। ପାରିବାରିକ କହଳକୁ କେନ୍ଦ୍ର କରି ବଡ ଭାଇଙ୍କୁ ଆକ୍ରମଣ କରିଥିଲା ସାନ ଭାଇ। ଗୁରୁତର ହେଲେ ପ୍ରତାପ ଚୌଧୁରୀ। ତାଙ୍କ ବୟସ ୬୨ ବର୍ଷ। ଏ ନେଇ ପ୍ରତାପ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଆଧାରରେ ପୋଲିସ୍ ମାମଲା ରୁଜୁ କରି ତଦନ୍ତ ଚଳାଇଛି। ଅଭିଯୁକ୍ତ ସାନ ଭାଇ ବର୍ତ୍ତମାନ ଫେରାର ଅଛି।

ହିଞ୍ଜିଳି ଥାନା ଖଣ୍ଡରା ଗ୍ରାମର ୨ ଭାଇ ପ୍ରତାପ ଓ ଶ୍ରୀକାନ୍ତଙ୍କ ମଧ୍ୟରେ କୈାଣସି କଥାକୁ ଝଗଡ଼ା ହୋଇଥିଲା। ଶୁକ୍ରବାର ଅପରାହ୍ନରେ ବଡ଼ଭାଇ ଘରେ ଥିବାବେଳେ ସଂପୃକ୍ତ ଗ୍ରାମର ୫ ଜଣ ପ୍ରତାପଙ୍କ ଘରକୁ ଆସି ଗଣ୍ଡଗୋଳ କରିଥିଲେ । ପରେ ତାଙ୍କର ସାନ ଭାଇ ଆସି ଏକ ଟାଙ୍ଗିଆରେ ଅର୍ତକିତ ଆକ୍ରମଣ କରିଥିଲେ । ଆକ୍ରମଣରେ ବଡ଼ଭାଇ ଗୁରୁତର ଆହତ ହୋଇଥିଲେ । ସାହି ପଡୋଶୀ ଘଟଣା ସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରି ଚିକିତ୍ସା ନିମନ୍ତେ ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ ।