ଲୁଗା ଦୋକାନୀଙ୍କୁ ଖଣ୍ଡାରେ ହାଣିଲେ ୨ ଭାଇ
ଜଳେଶ୍ୱର:-ଲୁଗା ଦୋକାନୀଙ୍କୁ ଖଣ୍ଡାରେ ହାଣିଲେ ୨ ଭାଇ। ଏଥିରେ ଦୋକାନୀଜଣକ ଆହତ ହୋଇଥିବା ବେଳେ ଆକ୍ରମଣକାରୀଙ୍କ ଭିଡିଓ ସିସିଟିଭିରେ କଏଦ ହୋଇଛି। ଆକ୍ରମଣକାରୀ ୨ ଯୁବକ ଗିରଫ ହୋଇଥିବା ବେଳେ ସେମାନେ ୨ ଭାଇ ବୋଲି ଜଣାପଡ଼ିଛି। ଏପରି ଛାତିଥରା ଦୃଶ୍ୟ ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଭୋଗରାଇ ଅଞ୍ଚଳରେ।
ଆକ୍ରମଣ କରିଥିବା ଦୁଇ ଯୁବକ ହେଲେ ସ୍ଥାନୀୟ ଅଞ୍ଚଳର ରାଜେନ୍ଦ୍ର ଜେନା ଓ ଜିତେନ୍ଦ୍ର ଜେନା । ସେମାନେ ଦୁଇ ଭାଇ ଅଟନ୍ତି।ସ୍ଥାନୀୟ ଲୋକେ ଆକ୍ରମଣ କରିଥିବା ଯୁବକ ଓ ତାଙ୍କ ଭାଇଙ୍କୁ କାବୁ କରି ପୁଲିସ ଜିମା ଦେଇଛନ୍ତି।ସୂଚନା ଅନୁଯାୟୀ,ଶନିବାର ରାତିରେ ରାଜେନ୍ଦ୍ର ଓ ଜିତେନ୍ଦ୍ର ଲୁଗା ଦୋକାନ ସାମ୍ନାରେ ଏକ ସିମେଣ୍ଟ ବୋଝେଇ ଗାଡ଼ିକୁ ଅଟକାଇବା ସହ ଗଣ୍ଡଗୋଳ କରୁଥିଲେ। ତେବେ ଲୁଗା ଦୋକାନୀ ବୁଝାସୁଝା କରିବାକୁ ଯିବା ବେଳେ ଦୁଇ ଭାଇ ଦୋକାନରେ ପଶି ତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ଭୋଗରାଇ ପୁଲିସ୍ ଏ ନେଇ ଏକ ମାମଲା ରୁଜୁ କରିବା ସହ ଘଟଣାର ତଦନ୍ତ ଚଳାଇଛି ।